Ինչպե՞ս են բարևում տարբեր երկրներում

Ինչպե՞ս են բարևում տարբեր երկրներում. 10 ամենաանսովոր բարևելու ձևերը

10. Զատկի կղզի

 Զատկի կղզու բնակիչները բարևելիս ուղիղ կանգնում են, սեղմում են բռունցքները, ապա առաջ են պարզում ձեռքերը, բարձրացնում են գլխից վեր, բացում են ափերը և թույլ են թողնում ձեռքերը, որպեսզի դրանք «ընկնեն» ներքև: Կա նաև ավելի պարզ տարբերակ. ափերն իրար ենք կպցնում, բարձրացնում ենք ձեռքերը վեր, այնուհետև ափերը վեր ենք պարզում, ապա թեթևակի խփում դեմքներիս:

9.  Քենիա

Քենիայում բնակվող Ակամբա ցեղի ներկայացուցիչները միմյանց ողջունելիս և ի նշան խորագույն հարգանքի՝ թքում են միմյանց երեսներին: Նման բարևելու ձև կիրառվում է նաև մասսայի ցեղում, այն տարբերությամբ, որ ոչ թե իրար երեսի են թքում, այլ թքում են ձեռքի մեջ ու սեղում իրար ձեռքերը:

 8. Միջնադարյան Եվրոպա

Պարզվում է, որ «Memento mori» (լատիներեն նշանակում է «հիշիր, որ դու մահանալու ես») հայտնի խոսքը նաև եղել է ողջույնի տեսակ: Միջնադարյան Եվրոպայում տրապպիստների միաբանության անդամները այդ կերպ էին ողջունում միմյանց՝ այդպիսով հիշեցնելով, որ մարդը պետք է արժանապատիվ կյանք վարի, որպեսզի խուսափի խիստ պատժից այն աշխարհում:

7. Հարավսլավիա

 Բավականին օրիգինալ ողջույնով էին հանդես գալիս սերբերը՝ ռուս խաղաղապահներին տեսնելիս: Նրանք «Здравствуйте»-ի փոխարեն ասում էին «С-300»` ակնարկելով այդ կերպ, որ ռուսները այդպես էլ չտվեցին սերբերին այդ ՀՕՊ համակարգերից՝ ՆԱՏՕ-ի ռմբակոծություններին դիմակայելու համար:

6. Ճապոնիա

 Ողջույնի արարողակարգին ամենալուրջը ճապոնացիներն են մոտենում: Նրանք հատուկ բարևելու համար նախատեսված երեք տարբեր խոնարհվելու ձևեր ունեն՝ սայկեյռեյ (ամենախորը խոնարհումը), միջին խոնարհում՝ 30 աստիճան անկյան տակ և թեթև խոնարհում՝ 15 աստիճան անկյան տակ: Ամենախորը խոնարհումով ողջունում են ամենահարգված ու հարուստ մարկանց:

5. Ամերիկա

Որոշ բնիկ ամերիկյան ցեղերի մոտ ընդունված է, որ տեսնելով անծանոթի, ցեղի ներկայացուցիչը պետք է պպզի՝ ի նշան ողջույնի, և մնա այդ դիրքում այնքան, մինչև անծանոթը նկատի իրեն:

4. Սամոա

Սամոայում մարդիկ կարող են վիրավորվել ձեզանից, եթե ողջունելիս դուք չհոտոտեք նրանց:

3. Նոր Գվինեա

Գվինեական կոիրի ցեղի ներկայացուցիչները միմյանց հանդիպելիս միմյանց ծնոտներն են խուտուտ տալիս:

2. Տիբեթ

Երբ հանդիպում են երկու տիբեթցի, նրանք աջ ձեռքով հանում են գլխարկը, իսկ ձախ ձեռքը դնում են ականջի հետևը ու լեզու են հանում:

1. Նոր Զելանդիա

Նոր Զելանդիայի աբորիգեն մաորիները անկասկած ամենատարօրինակ բարևելու ձևն են մշակել, որը այնքան բարդ է, որ ենթադրում է մարմնամարզության որոշակի իմացություն, սակայն ամեն ինչ հերթով. հանդիպելիս մաորիները սկզբում սկսում են բարկացած տեսքով ինչ-որ բառեր գոռգոռալ, հետո սկսում են որքան ուժ ունեն ոտքերով գետնին խփել, այնուհետև փքում են իրենց կուրծքը, չռում են աչքերը և սկսում մերթընդմերթ լեզու ցույց տալ:

Հ.Գ. Կենդանական աշխարհում ևս սիրում են ողջունել: Օրինակ` փղերը կարող են ողջունել միմյանց 32 կիլոմետրի վրա, իսկ առանձին դեպքերում նրանց ողջույնի ազդանշանը լսելի է 150 կիլոմետրի վրա էլ: Փղերը պարզապես սկսում են ոտքերով գետնին դմփդմփացնել: